Mërgim Berisha nuk është njeri i fjalëve të mëdha. Të paktën, jo jashtë fushës. Të premten në mbrëmje pasi shënoi golin e fitores 1:0 ndaj Leverkusenit, 24-vjeçari ishte i relaksuar, qeshi dhe përgëzoi skuadrën, ka shkruar “Kicker” të shtunën.
“Ne rezistuam, kishim qëndrimin tonë në fushë. Kjo na bëri të veçantë më vonë”, është shprehur pas ndeshejs Berisha.
Me fitoren e dytë në shtëpi këtë vit, Augsburgu mund të marrë frymë më lirshëm.
Ka grumbulluar 21 pikë në 19 ndeshje dhe po i afrohet zonës së rehatisë në mesin e tabelës.
Augsburgu ka marrë gjashtë pikë nga duelet kundër Dortmundit, Moenchengladbachut, Freiburgut dhe Leverkusenit.
Pra, po kalon formë të mirë.
“Po bëjmë gjëra të mira dhe kemi pasur zhvillim të mirë në këtë periudhë”, është shprehur Berisha duke përgëzuar bashkëlojtarët.
Berisha ka shënuar gola për Augsburgun në tri ndeshjet e fundit.
Fjalë të mira për sulmuesin e Augsburgut, pati edhe trajneri i tij, Enrico Maassen.
“Nuk mendoj se ka ndonjë sulmues 9-sh më të mirë se ai në Gjermani. Mund ta shihni kualitetin që e ka në përfundimin e aksioneve. Me të majtën, me të djathtën, me kokë. Ai është lojtar i jashtëzakonshëm në zonë, që kontribuon edhe në fazën defensive. Ka pasur zhvillim të madh”, është shprehur trajneri Maassen.
Berisha, shkruan “Kicker”, po e pret thirrjen nga trajneri i Gjermanisë, Hansi Flick.
“Gjëja e vetme që unë mund të bëj është të jap 100% nga vetja në fushë dhe ta marrë maksimumin nga aty. Ai vendos më pas. Natyrisht se do të isha i lumtur”, ka thënë Berisha.
Marcus Sorg, asistenti i Flickut, ishte në tribuna të premten mbrëma dhe e pa golin që Berisha e shënoi në fitore.
“Ai është në formë shumë të mirë”, ka thënë drejtori sportiv i Augsburgut, Stefan Reuter. “Mërgimi shënon gola të rëndësishëm dhe vendimtar. Kjo është gjë e madhe”, theksoi ai.
Nëse vazhdon të luajë me të njëjtin ritëm, fituesi i Evropianit U21 me Gjermaninë, mund ta veshë fanellën e ekipit senior në muajin mars. /KOHA/