Kombëtarja U-21 e Kosovës është grumbulluar në Antalya të Turqisë për t’u përgatitur sa më mirë për ndeshjet kualifikuese për Evropianin ‘Sllovakia 2025”.
Kosova U-21 fillimisht do të ballafaqohet me Moldavinë U21, më 24 mars në Antalya dhe më pas kundër Turqisë U21, më 27 mars në Alanya, përcjell GazetaBlic Sport.
Një nga lojtarët e ftuar nga trajneri Afrim Toverlani është edhe Behar Neziri, i cili luan tek të rinjtë e klubit të Bayern Munich.
Ai u shpreh shumë i lumtur me ftesën nga Kosova U-21, teksa thotë se ka dëshirë që të përfaqësojë gjithmonë Kosovën.
“Jam shumë i lumtur për ftesën, sepse kam dëshirë të luajë për kombëtaren e Kosovës, jam shumë i lumtur që e kam këtë mundësi të luajë për U-21 momentalisht”, tha fillimisht Behar Neziri për ‘GazetaBlic Sport’.
Ai më pas tregoi se në Gjermani tek Bayern Munich gjithçka po shkon për mrekulli.
“Tek Bayern Munich gjithçka po shkon mirë. Jam qe gjashtë vite tek kjo skuadër dhe gjithçka po shkon super”, vazhdoi ai.
Në fund, Neziri, i cili luan si mesfushor, potencoi se në të ardhmen ka dëshirë të luajë edhe për Kosovën A.
“Është ëndërr për secilin lojtar që luan futboll, të gjithë kanë dëshirë të luajnë tek kombëtarja A. Kam dëshirë të luajë për kombëtaren A, të shohim se çka do të ndodhë në të ardhmen”, përfundoi ai.