Më 14 shtator të vitit 2021, Federata e Futbollit të Kosovës (FFK) pagoi rreth 20 mijë euro për një veturë që do të përfundonte e regjistruar në pronësi private të drejtorit të kombëtares, Muharrem Sahiti.
Vetura dyshohet se është paguar plotësisht nga mjetet e Federatës së Futbollit të Kosovës, të drejtuar nga Agim Ademi.
Pothuajse një vit e gjysmë më vonë, hetimet e Krimeve Ekonomike të Policisë së Kosovës kanë rezultuar me Agim Ademin dhe Muharrem Sahitin si të dyshuar për rastin. Kryetari i FFK-së është ndaluar nga policia më 22 mars, ndërsa drejtori i kombëtares është intervistuar në cilësinë e të dyshuarit të hënën e 3 prillit.
Paparaci merr vesh se vetura të cilën FFK-ja e kishte paguar për Muharrem Sahitin, vlente rreth 20 mijë euro. Ajo është sekuestruar të hënën nga Policia e Kosovës.
“Andaj si rezultat i hetimeve të realizuara nga Njësiti Rajonal për Hetimin e Krimeve Ekonomike dhe Korrupsionit-Prishtinë, dyshohet se vetura e lartcekur në mënyrë të kundërligjshme është përvetësuar dhe regjistruar në emër të personit privat në FKK, andaj e njëjta është sekuestruar”, ka bërë të ditur policia të hënën përmes një komunikate për media.
Siç ka mësuar Paparaci, vetura është tregtuar në një autosallon privat me bazë në Vushtrri.
Rasti është duke u hetuar nga Krimet Ekonomike si keqpërdorim financiar me buxhetin e FFK-së.
Nën të njëjtat dyshime është ndaluar muajin e kaluar kreu i FFK-së, Agim Ademi. Ai, ndodhet në arrest shtëpiak. /Paparaci.com