E ardhmja e Ermal Krasniqit te CFR Cluj duket se nuk do të jetë e gjatë. Sipas mediumit rumun ‘SportMedia.ro’ klubi i fundit që po kërkon anësorin kosovar është Lazio, transmeton Gazeta Metro.
Ish-futbollisti i Ballkanit po kalon formë të jashtëzakonshme me skuadrën e udhëhequr nga Dan Petrescu dhe kjo ka bërë që disa skuadra të vihen pas tij.
Siç raportohet ai tani ka ngjallur interesimin edhe të Lazios, skuadër ndaj të cilës bëri dy ndeshje perfekte në Conference League.
Elozhe për të kishte thurur edhe trajneri Maurizio Sarri duke thënë se ”është lojtar shumë i fortë dhe është gati për ndeshje dhe kundërshtar të mëdhenj”.
Për një interesim të mundshëm për Krasniqin ka folur edhe menaxheri rumun i lojtarëve, Giovani Becali. Ai tha se kartoni i tij aktualisht vlerësohet rreth katër milionë euro.
”Një klub është i interesuar për Krasniqin. Unë kam një shok me origjinë shqiptare që ka pozitë në disa klube, është lojtar i rëndësishëm, është vetëm 24 vjeç, ka ardhur nga askund dhe është surpriza e CFR’ës. Vlerësohet rreth 4 milionë euro,” tha ai për ‘Fanatik’.
Kujtojmë se Ballkani në janar e shiti atë për shumën e 300 mijë eurove për shkak se do t’i skadonte kontrata në verë dhe zotëron gjithashtu 15% të një transferimi të mundshëm.
Krasniqi ka realizuar katër gola dhe ka dhënë një asistim në nëntë ndeshjet e luajtura për CFR Cluj në Superligën e Rumanisë.