Klubi kosovar i futbollit nuk po kalon formë të mirë që prej rikthimit të Superligës për sesionin pranveror.
Drenica ka pësuar katër humbje radhazi, duke bërë që të shkarkohet edhe trajneri kryesor i skuadrës, Bekim Shotani që pas ndeshjes ndaj Gjilanit, shkruan GazetaBlic Sport.
Për situatën aktuale të klubit dhe objektivat e këtij sezoni për GazetaBlic Sport ka folur lojtari i Drenicës, Ermal Veliqi.
Veliqi deklaroi që pas humbjeve rrjedhimisht edhe motivi i skuadrës ka rënë paksa, por shpreson që klubi do ta marrë vetën dhe të rikthehet te fitoret që në ndeshjen e ardhshme ndaj Ferizajt.
“Po siç e dimë pas 4 humbjeve, motivi tek lojtarët bie, por atmosfera në ekip që sot do të ndryshojë dhe besoj që kemi forcën që prej lojës me Ferizajn të tregojmë një fytyrë të re”, tha fillimisht ai.“Nga dueli me Ferizaj do të hyjmë për fitore dhe presim vetëm tre pikët e plota”, shtoi ai.
Veliqi vazhdoi duke deklaruar se beson që Drenica mund ta shmang rënien në këtë edicion dhe më pas të nisin sezonin e ri me objektiva të reja.“Për këtë sezon shpresoj dhe besoj që do ta shmangim rënien nga Superliga, pastaj nga qershori do të shohim për objektivat dhe planet e klubit. Jemi të gjithë bashkë më shumë se kurrë për këtë qëllim”, përfundoi Veliqi intervistën me GazetaBlic Sport.