Federata e Futbollit e Serbisë i është drejtuar sot UEFA-s me një letër tejet qesharake, duke i kërkuar t’i bëjë presion Federatës së Futbollit të Kosovës të lejojë zhvillimin e garave të jashtëligjshme serbe brenda territorit të Republikës së Kosovës.
Policia e Kosovës ua ndaloi zhvillimin e garave klubeve serbe në fundjavë, të cilat nuk e njohin Federatën e Futbollit të Kosovës dhe duan të luajnë nën ombrellën e Federatës së Serbisë brenda territorit të Kosovës.
Federata e Futbollit e Kosovës është institucioni i vetëm i thirrur për të organizuar gara futbolli në Kosovë dhe njihet nga UEFA me të drejta të plota.
Klubet serbe dhe serbët në Kosovë nuk kanë shfaqur asnjëherë interesim për t’u integruar apo luajtur në sistemin e garave të vendit dhe janë manipuluar nga Serbia për t’i shpërfillur institucionet e Republikës së Kosovës për të bërë gara të veta të jashtëligjshme.
Në një letër dërguar UEFA-s të hënën nga federata serbe, shkruhet: “Ne ju njoftojmë me shqetësim të madh se, në ditët e fundit, institucionet e përkohshme në Prishtinë, kanë bërë presion të jashtëligjshëm dhe jonjerëzor në klubet e futbollit… në Kosovë.”
“Institucionet në Prishtinë i frikësojnë lojtarët e futbollit dhe zyrtarët e sportit të etnisë serbe duke ua ndaluar stërvitjet në stadiumet e veta dhe organizimin e garave lokale.”
Sikur federata serbe nuk është e vetëdijshme se UEFA e njeh vetëm FFK-në në Kosovë, federata serbe e bëri këtë kërkesë tejet qesharake: “Duke e parë autoritetin tuaj dhe autoritetin e pozitës që keni, ne ju kërkojnë të merrni qëndrim për ndalimin e këtyre praktikave. Ne ju kërkojmë po ashtu të ndihmoni me kohë, në mënyrë që të shmanget përshkallëzimi i problemeve që mund të nxiten dhe shkaktohen nga veprimet ilegale të institucioneve të Prishtinës”./nacionale
