Ferizaj dhe Ballkani do të takohen në kuadër të xhiros së 26-të në Albi Mall Superligën e Kosovës.
Vendasit janë duke kaluar nëpër një formë të shkëlqyer në edicionin pranveror, ku janë skuadra me më së shumti pikë të grumbulluara.
Të besuarit e Andrej Panadic kanë marrë 14 pikë nga 21 të mundshme dhe nuk duan të ndalen me kaq.
Ferizajasit kanë zhvilluar tre ndeshje në shtëpi ndaj skuadrave të forta si Prishtina, Drita e Llapi dhe kanë mposhtur që të tria.
E për të fituar edhe duelin e katërt në pranverë para tifozëve të tyre, ferizajasit kanë vendosur t’i motivojnë futbollistët e tyre.
Gazeta Olle ka mësuar se drejtuesit e klubit bardhekaltër i kanë njoftuar futbollistët se kanë super prmio nëse mposhtin Ballkanin.
Kujtojmë që futbollistët vendas kanë fituar premio të majme edhe për fitoren ndaj Dritës, por burimet e Olles bëjnë me dije se për ‘kokën’ e Ballkanit premio është edhe më e madhe se ajo e 25 shkurtit.
Motivi duket i madh te vendasit dhe mbetet të shihet nëse do t’i dalin të marrin një tjetër fitore ndaj Ballkanit që janë në krizë të rezultateve dhe kanë pesë ndeshje që nuk fitojnë mes kampionatit dhe Kupës.
Gjithashtu së fundmi është raportuar se ka krizë financiare edhe te Ballkani, edhe pse kampioni në fuqi i Kosovës e ka mohuar një gjë të tillë nëpërmjet një komunikate për media.
Ferizaj dhe Ballkani takohen në stadiumin me bari sintetik në Ferizja të dielën me fillim nga ora 13:00.