Analisti i mirënjohur i futbollit kosovar, Genc Sermaxhaj, ka thënë se finalja e Superkupës së Kosovës ndërmjet Llapit dhe Ballkanit do duhej të zhvillohej në Kosovë, transmeton Gazeta Metro.
Finalen që u zhvillua në një qendër stërvitore të quajtur ‘Titanic Football Center’ në Antalya të Turqisë, Sermaxhaj e ka quajtur ”një lojë stërvitore me dy ngjyra”.
”Finalja e Superkupës së Kosovës në futboll në mes Llapit e Ballkanit, do duhej të zhvillohej në Kosovë. Gjithashtu prania e dy tifozerive të ekipeve përkatëse në stadium, do të krijonte një ambient të bukur sportiv duke e bërë ndeshjen më atraktive e më rivalizuese. Gjithçka që pamë, ishte një lojë stërvitore me dy ngjyra,” ka shkruar ai në Facebook.
Ndryshe, Ballkani triumfoi me rezultat 0-1 me golin e shënuar në minutën e 62’të nga mbrojtësi Lumbardh Dellova.
Për suharekasit kjo ishte hera e parë në histori të klubit që fitojnë Superkupën e Kosovës, teksa Llapi ‘sefte’ ia kishte bërë sezonin e kaluar duke mposhtur Prishtinën.
