Taulant Hodaj, sekretari në detyrë i FFK-së, foli në emisionin sportiv të “ATV” rreth zërave që qarkulluan nga Franca rreth kurdisjeve potenciale që ka bërë Llapi.
Në këtë javë ka dominuar në debatin sportiv vendor lajmi që ka ardhur nga Franca se janë 4 ndeshje të Superligës së Kosovës që po hetohen për kurdisje ndeshjes. Sipas atyre raportimeve është Llapi protagonist i tyre, shkruan Futbollikosovar.net.
Në emisionin “Ekipi A”, në lidhje direkte foli u.d. i Sekretarit të Përgjithshëm të FFK-së, Taulant Hodaj, i cili sqaroi pozicionin e FFK-së dhe më të rejat në këtë aspekt.
“Është ftuar të raportojë zyrtari për integritet në kuadër të FFK-së, i cili është në kontakt me UEFA-n. Çdo gjë që ka ardhur si raportim e ka përcjellur te Këshilli Kombëtar për Parandalimin e Dhunës dhe Dukurive Negative në Sport, që udhëhiqet nga kryeprokurori aktual. Çdo gjë është me shkrim që FFK i ka përcjellur me kohë çdo raportim potencial. Në kuadër të FFK-së nuk ka pasur indicie për trukime apo diçka të tillë. Deri tani janë vetëm këto raportimet nga mediet. Asgjë s’ka zyrtare nga asnjë institucion në Francë apo nga UEFA. FFK i merr këto me seriozitet. Çkado që të dalë do të marrë edhe vetë masat nëse ekziston diçka e tillë. E ka infrastrukturën ligjore. Janë organet përkatëse që do të veprojnë nëse eventualisht ka të gjetura nga organet e drejtësisë në këtë drejtim”, tha ai.