Skuadra e Dukagjinit ka marrë dje një barazim 1-1 në udhëtim ndaj kampionit aktual Ballkanit në Suharekë.
Klubi i Armend Dallkut luajti një ndeshje shumë të taktizuar, ku edhe në fund foli nga Suhareka me një pikë shumë të vleshme në këtë pikë të kampionatit, shkruan GazetaBlic Sport.
Mbrojtësi i Dukagjinit, Ilir Syla thotë se skuadra e tij po luan mirë në këtë fillim të stinorit pranveror, teksa pikët nuk do t’i mungojnë në ballafaqimet e ardhshme.
“Duke i marrë parasysh kundërshtarët e vështirë që i kemi pasur në fillim të edicionit mund të them se jemi të kënaqur me paraqitjen e ekipës, me atë që kemi tregu deri tash. Sa i përket pikëve kemi mujt me bë edhe më mirë, por gjithsesi po tregojmë ndeshje të mira, andaj nuk e besoj që edhe pikët do të na mungojnë në të ardhmen”, tha fillimisht Ilir Syla për ‘GazetaBlic Sport’.
Barazimi ndaj Ballkanit në udhëtim do të jetë një motivim shtesë për ekipin, sipas qendër-mbrojtësit.
“Padyshim që pika e fituar me Ballkanin na motivon në rrugëtimin drejt objektivave që ka klubi, në krjimin e një skuadre të fort konkurruese në çdo ndeshje, pa marrë parasysh kundërshtarin”, vazhdoi ai.
Në xhiron e ardhshme në Superligën e Kosovës në futboll, Dukagjini luan ndaj Gjilanit, teksa Syla potencon se kjo do jetë ndeshje shumë interesante – ku edhe do ta japin maksimumin për të fituar pikët e plota.
“Dueli me Gjilanin do jetë mjaft i vështirë pasi që e dijmë se kanë një skuadër të fort dhe me një ecuri shumë të mirë në këto ndeshjet e fundit – por ne jemi të motivum dhe presim ta japim maksimumin në këtë ndeshje duke shpresu në pikë të plota”, përfundoi ai.