Bekim Balaj ishte goditja e madhe e Xhaferit në merkaton e dimrit te Vllaznia. Sulmuesi zgjodhi të kthehej në vendin e tij dhe të ndihmojë ekipin në luftën për titullin kampion.
Por sa do të paguhet Balaj dhe kur do të debutojë me Vllazninë? Në një intervistë për “Ora Sport” që transmetohet në “Ora Neës”, gazetari shkodran Denis Bajraktari ka zbuluar gjithçka.
“Lëvizje e bujshme kjo e Balaj, ka që vitin e kaluar që diskutohej për emrin e tij në kampin shkodran. Prite të ndihmojë Vllazninë në pjesën e mbetur të sezonit. Shpresojmë se do të prodhojë atë që duhet në fushën e lojës pasi sulmi dhe mbrojtja ka qenë reparti më problematik i yni. Sipas informacioneve që kam nuk do të jetë gati për ndeshjen e mesjavës me Kupën, por me shumë mundësi do të jetë gati për ndeshjen me Laçin në kampionat.
Ka pasur një takim prej 2 orësh me presidentin Xhaferi dhe pastaj firmosi për tre vite. Megjithatë duket pak disi e habitshme duke parë moshën e tij. Do të vijnë më shumë tifozë në stadium? Tifozët e Vllaznisë e kanë treguar se nuk gënjëhen aq lehtë, duan rezultate për të ardhur më shumë në stadium. Ata kërkojnë disa ndeshje radhazi që të jenë dinjitoze. Sa i përket pagës së Balajt, jo në mënyrë zyrtare, por flitet se merr 8000 euro”, tha Bajraktari. /Sport Ekspres/