Liverpool-i do ta ketë shumë të vështirë misionin “kualifikimi në çerekfinale të Ligës së Kampionëve”, pasi që duhet ta përmbysë epërsinë prej tre golave në ndeshjen ndaj Real Madrid-it.
“The Reds” do të përballen në udhëtim me madrilenët në ndeshjen e dytë, teksa takimi i parë në “Anfield” u mbyll me rezultat 5:2 në favor të Real-it, pavarësisht se anglezët ishin duke fituar 2:0.
Në konferencën për media edhe vetë trajneri i Liverpool-it, Jurgen Klopp, e ka pranuar që do të jetë thuajse e pamundur të kualifikohen, por ai shtoi se ekipi i tij do të përpiqet ta përmbysë këtë rezultat.
“Ajo që kam thënë tre javë më parë, është se Real Madrid-i u kualifikua. Por tani e dimë se kemi një lojë për të luajtur. Shansi është vetëm 1% që të kualifikohemi, por do të përpiqemi”, tha fillimisht tekniku gjerman.
“Do të përballemi me një kundërshtar të fortë, por duam të fitojmë, për këtë jemi këtu dhe nuk kemi asgjë për të humbur”, shtoi Klopp.
I pyetur nëse kjo ishte ndeshja më e vështirë që ai kishte përgatitur, Klopp tha: “Më e vështira? Nuk e di, është e vështirë sepse ndoshta nuk do të kalojmë në ndeshjen tjetër”.
“Por në këtë sallë mendoj se 100 për qind e njerëzve mendojnë se ne nuk kemi asnjë shans dhe nëse unë jam i vetmi që mendoj se kemi pak mundësi, jam mirë”, tha mes tjerash Jurgen Klopp./AP