Pas humbjes në mesjavë kundër Trepçës’89, Drenica ka për synim t’i rikuperojë pikët e humbura në ndeshjen ndaj Dukagjinit. Kapiteni i kuqezinjve, Shkëlzen Lushtaku, ka folur për Gazeta Metro para këtij dueli dhe thotë se nesër në Klinë pret një ndeshje të fortë.
Në stadiumin ’18 Qershori’ nesër nga ora 13:00 do të ndeshen Dukagjini dhe Drenica, takim ky i vlefshëm për xhiron e 25’të të Superligës së Kosovës.
Drenica nuk është në formën e saj më të mirë, por sipas Lushtakut skuadra është përgatitur në mënyrën e duhur për përballjen ndaj klinasve.
”Po besoj që do të jetë një lojë e fortë dhe besoj që gjatë këtyre dy ditëve kemi pasur kohë të përgatitemi. Kemi punuar për këtë takim edhe pse është është kohë e shkurt dhe po besoj që është orar i ngarkuar për ligën tonë. Besoj që do t’ia dalim pas asaj humbje që na erdh pas lëndimeve që na prishën ekuilibrin ndaj Trepçës’89,” tha ai për Gazeta Metro.
Kapiteni i skuadrës së udhëhequr nga Bledar Devolli potencoi se nuk sheh ndonjë përparësi të tyre ndaj Dukagjinit.
Ai në fund deklaroi se nga tani e tutje çdo ndeshje për Drenicën do të jetë sikurse një finale.
”Nuk besoj që do të kemi ndonjë avantazh, do të jetë një lojë e fortë dhe për ne çdo ndeshje në vazhdim është finale,” përfundoi ai.
Drenica aktualisht gjendet në pozitën e fundit në renditjen tabelore me 23 pikë, ndërsa Dukagjini renditet në vendin e pestë me 29 pikë.
Vlen të theksohet se përveç skuadrave që po luftojnë për titull dhe atyre për një vend në garat evropiane, garë tejet e ashpër po zhvillohet edhe për mbijetesë.
Në këtë ‘valle’ përveç dy klubeve të lartcekura, janë edhe Ferizaj me 24 pikë, Malisheva 25, Trepça’89 26 dhe Llapi 29.