Pretendimet janë të mëdha gjithmonë, por rezultatet në Superligë lënë shumë për të dëshiruar.
Llapi ka dalë dy herë në arenën evropiane, por vetëm përmes Kupës së Kosovës ku e kanë fituar në dy vitet e fundit.
Përkundër premtimeve të kryetrajnerit Tahir Batatina se do të jenë në mesin e tre skuadrave më të mira në Kosovë, një gjë e tillë nuk po ndodh.
Pas një starti fantastik, Llapi pësoi goditje nga mediat franceze që zbuluan skandalin për kurdisje ku llapjanët po akuzohen për disa ndeshje.
Gjithsesi hetuesia kosovare ka nisur hetimet dhe deri më tani asgjë nuk ka konkrete, por ato lajme të botuara në Francë duket se e kanë goditur klubin llapjan që ka dy humbje radhazi.
Tani kur kanë kaluar 23 xhiro në Albi Mall Superligë, Llapi zë vendin e pestë në tabelë me 29 pikë, nëntë më pak se vendi i tretë që mbahet nga Gjilani me 38 sosh.
Por llapjanët përkundër pretendimeve të mëdha janë më afër rënies nga Superliga se sa vendit që i dërgon në Evropë.
Vendi i fundit që është Ferizaj ka 21 pikë (8 më pak), derisa Trepça ’89 që mban vendin e nëntë ka 23 pikë apo gjashtë më pak se Llapi.
Të besuarit e Tahir Batatinës në krizë të rezultateve në mesjavë luajnë ndaj një kundërshtari shumë të vështirë siç është Ferizaj.
Ndoshta pozita në tabelë i bën llapjanët favorit në letër, por Ferizaj i ka mposhtur në dy ndeshjet e para, 2-1 në Ferizaj dhe 1-2 në Podujevë.
Mbetet të shihet nëse do të ketë reflektim nga Llapi, pasi një tjetër rezultat negativ ata mund t’i bëj të mbeten shumë larg Evropës, por edhe të përfshihen fuqishëm në luftën për mbijetesë, luftë që po bëhet shumë e ashpër.
Ferizaj dhe Llapi takohen të mërkurën në stadiumin me bari sintetik në Ferizaj me vendasit që gjithashtu kërkojnë reflektim pas humbjes së pamerituar nga Drenica.
