Edhe futbollisti i Kosovës, Vedat Muriqi, ka reaguar për mos-pjesëmarrjen e boksieres kosovare, Donjeta Sadikut, në Kampionatin Botëror të boksit që do të mbahet në Indi.
Sulmuesi i Mallorca-s me anë të një postimi në “Tëitter” ka thënë se politika nuk duhet t’i pengojë sportistët.
“Duke qenë se flamuri dhe himni i Kosovës nuk u pranuan për arsye politike në Indi, Donjeta Sadiku nuk do të marrë pjesë në turneun e boksit”.
“Nuk duhet harruar fuqia unifikuese e sportit dhe këto sanksione nuk duhet të zbatohen ndaj sportistëve”, ka shkruar Vedat Muriqi.
As the Kosovo flag and anthem were not accepted beacuse of political reasons in India, Donjeta Sadiku will not attend the boxing tournament. The unifying power of sports should not be forgotten and these sanctions should not be applied to athletes.#RroftRepublikaEKosoves 🇽🇰 https://t.co/RFuWfB2ysr
— Vedat Muriqi (@MuriqiVedat) March 14, 2023
Ndryshe Ministria e Jashtme e Indisë dha të hënën dritën e gjelbër për marrjen e vizës për ekipin e Kosovës, kurse disa orë më vonë, Federatës së Boksit të Kosovës iu kushtëzua pjesëmarrja.
Organizatori i Kampionatit bëri me dije se pjesëmarrja e boksieres Sadiku mund të bëhet vetëm me dy kushte.
Kushti i parë ishte që flamuri i Kosovës dhe himni shtetëror nuk do të përdoren në ndonjërën nga ceremonitë gjatë kampionatit botëror.
Dhe, kushti tjetër ishte se pjesëmarrësit e Kosovës nuk do të lejohen të mbajnë flamurin e tyre, qoftë edhe në veshjet e tyre në formë të printuar.
Duke pasur parasysh kushtet “diskriminuese” të vendosura nga organizatorët e turneut, Komiteti Olimpik i Kosovës dhe Ministria për Kulturën dhe Sportin vendosën të mos paraqiten në Botëror.
Kjo është hera e tretë që Sadikut i mohohet pjesëmarrja në Kampionatet Botërore në Indi dhe njëherazi mundësia për të fituar një tjetër medalje botërore. /Albanian Post/