Kombëtarja e Kosovës në fund të këtij muaji do të luajë ndeshjet e para në rrugëtimin e saj për Kampionatin Europian. Fillimisht, ‘Dardanët’ do të përballen ndaj Izraelit dhe pas tre ditëve janë nikoqir të Andorrës. Gazeta Metro ka kontaktuar me drejtorin e stadiumit ‘Fadil Vokrri’, Benet Rezniqi, i cili dha detaje për gjendjen momentale të stadiumit.
Për arsye se Kosova do të luajë ndaj Andorrës më 28 mars, skuadra e Prishtinës nuk po mund të luajë ndeshjet e saj si vendas në ‘Fadil Vokrri’.
FFK ka vendosur që t’i anulojë të gjitha aktivitetet e saj për arsye të përmirësimit të gjendjes së terrenit dhe tani bardhë e kaltrit janë të detyruar t’i presin kundërshtarët në stadiumin ‘Sami Kelmendi’ në Lipjan.
Drejtori i stadiumit ‘Fadil Vokrri’ për Gazeta Metro ka thënë se janë duke punuar vazhdimisht për ta përmirësuar gjendjen në mënyrën më të mirë.
Ai potencon se nuk ekziston rreziku që ndeshja mes Kosovës dhe Andorrës mos të zhvillohet në Prishtinë.
”Në përmirësim e sipër është dhe jemi duke punuar gjatë gjithë kohës. Nëse moti vazhdon të jetë kështu atëherë nuk do të kemi telashe. Por, nëse fillon të bjerë shi rreth dy ditë pa ndërprerë ose edhe borë atëherë mund të na shkaktoj telashe, por përsëri nuk paraqet problem që ndeshja mos të luhet.”
”Shpresoj që moti të vazhdoj të mbizotëroj kështu dhe edhe më e mirë do të ishte që të paktën deri më 28 mars disa ditë të jetë edhe me diell,” tha ai.