Federata e Futbollit e Kosovës (FFK) nuk do ta përfitojë asnjë cent nga ndihma financiare milionëshe që Ministria e Sportit ka vendosur ta ndajë për federatat e licencuara sportive për vitin 2023, si pasojë e paaftësisë së vet për t’u licencuar.
Njoftimin për këtë e ka dhënë zëvendësministrja e Kulturës, Rinisë dhe Sportit, Daulina Osmani, ku me anë të një postimi në rrjetin social Facebook ka treguar se federatat e licencuara kanë përfituar mbi 2,2 milionë euro.
Postimi i saj:
Duke u bazuar në llogaritjen e pikëzimit të federatave sportive për performancën e tyre të vitit që lëmë pas dhe vlerës së rritur të koeficientit nga Ministri Hajrulla Çeku, shuma totale e memorandumeve të nënshkruara sot me federatat e licencuara nga MKRS, tejkalon shifrën e 2.2 milionë eurove.
Mbështetja për këto federata reflekton rritjen prej afër 30% në krahasim me vitin 2022, ndërsa afër 100% në krahasim me vitin 2021.
