Trajnerit të Llapit, Tahir Batatina, duket se i kanë pëlqyer ofendimet e rënda nga disa qytetarë në drejtim të gazetares Qëndresa ‘Qeqa’ Krelani, transmeton Gazeta Metro.
Të dielën e kaluar në emisionin ‘Dueli Sportiv’ në RTV Dukagjini, Krelani ishte kritike për lojën e Llapit. Ajo ndër të tjerash tha se ”Llapi luan futboll pa taktikë, sikur në termina”, teksa la të nënkuptohet se për këtë nuk janë fajtor futbollistët.
E publikuar në Facebook kjo pjesë e debatit nxiti reagime të ndryshme, kishte nga ata që pajtoheshin me gazetaren, e të tjerë që nuk ndanin mendimin e njëjtë me të.
Dy prej tyre që nuk pajtoheshin me deklaratën e Krelanit u shprehën me një gjuhë ofenduese, duke e quajtur ‘mjerane’ e një tjetër edhe e shau. Të dyja komentet Batatina ka shfrytëzuar opsionin për t’i pëlqyer ato.
Kujtojmë se në të kaluarën shefi i shtabit teknik të Llapit kishte përdorur gjuhë seksiste ndaj Qeqa Krelanit duke i thënë se “ti në gazetari mundesh me palu gazeta, ose me pastru diçka por me analizu futbollin në qët mënyrë, jo.”
Këtë deklaratë të Batatinës e kishte dënuar edhe Asociacioni i Gazetarëve të Kosovës.
Ndryshe, Krelani është një nga gazetaret më kritike për dyshimet e kurdisje të ndeshjeve në futbollin kosovar, gjë për të cilën po dyshohet edhe Llapi, sipas dy gazetave prestigjioze franceze ‘Le Parisien’ dhe ‘Le Figaro’.