Tomas Strakosha është rikthyer nga dëmtimi që pësoi me Brentfordin pak muaj më parë. Portieri i Kombëtares shqiptare u lëndua në kyçin e këmbës gjatë pritjes së një penalltie ndaj shokut të skuadrës në një seancë stërvitore.
Tashmë ai është i gatshëm 100 % për klubin anglez dhe në ndeshjen e fundit ndaj Liverpulit, ku ekipi i Strakoshës fitoi 3-1 portieri ishte në stol.
Sa i përket aktivizimit, ky është një shqetësim tjetër, pasi Raja nuk ka ndërmend të lëshojë vendin, çka me shumë gjasa do të sjellë një lëvizje në muajin janar.
Ashtu siç u shpreh edhe menaxheri i tij, Strakosha duhet të gjejë një ekip tjetër, pasi nuk ka marrë minuta, ndërkohë në mediat angleze raportohet se portieri mund të huazohet në janar.
Deri tani dy janë pistat më të përmendura. E para është të qëndrojë sërish në Premier League dhe të provojë veten në një ekip tjetër që mund të jetë i interesuar për ta huazuar 6 muaj.
Pista e dytë që është më e mundshme është huazimi në një kategori më poshtë në Championship aty ku do kishte mundësinë të luante si titullar. E sigurt është largimi nga Brentford, po ashtu e sigurt është qëndrimi në Angli.