Sot është zyrtarizuar lista e Kombëtares së Shqipërisë për sfidën e parë eliminatore të “Euro 2024” kundër Polonisë në Varshavë, më 27 mars.
Trajneri Sylvinho ka ftuar futbollistët më në formë që janë momentalisht, duke kërkuar që të debutojë me fitore në kualifikueset e ‘Euro 2024.
Një nga emrat që nuk mund të mungonte brenda listës është ai i Taulant Seferit, që gjithmonë është një alternativë në sulm tek kuqezinjtë.Seferi ka realizuar 8 gola në 16 paraqitje gjatë këtij edicioni me fanellën e Vorlska Poltavas në Ukrainë.
Në një interevistë ekskluzive për ‘GazetaBlic Sport’, Seferi tha se ndjehet shumë i lumtur me ftesën nga trajneri Sylvinho dhe se do të tentojë të tregojë më të mirën e tij në fushë.
“Pa dyshim që jam shumë i lumtur, falënderimi i takon Zotit. Normalisht, çdo futbollist ka dëshirë të jetë pjesë e kombëtares, kështu që është një gjë shumë e bukur për mua dhe familjen time që ta përfaqësojmë Shqipërinë. Sa i përket besimit të trajnerit, pa dyshim se ndjehem shumë i vlerësuar dhe shpresoj të tregojë më të mirë në fushë, me lejen e Zotit”, tha fillimisht Seferi.
Më pas, ai foli edhe për qëllimin e madh të kualifikimit në ‘Euro 2024’, duke thënë se ka besim të plotë tek vetja e tij dhe bashkëlojtarët e ftuar.
“Jemi një kombëtare me shumë kualitet dhe kam shumë besim të plotë në angazhimin e të gjithëve. Me kokën lartë dhe me ndihmën e Zotit besoj fuqishëm se do t’ia dalim”, përfundoi Seferi.