Trajneri i Ballkanit, Ilir Daja, ka thënë se në finalen e Superkupës së Kosovës u pa çdo gjë, dhe ky fakt e bën të lumtur.
Kampioni në fuqi i elitës së futbollit kosovar, Ballkani, të shtunën fitoi trofeun e parë të këtij viti. Ballkani fitoi trofeun e Superkupës së Kosovës 2022, pasi mposhti skuadrën e Llapit 1:0 në Antalia të Turqisë, në ndeshjen e tensionuar në fund.
“Ishte lojë e fortë dhe e luftuar në fushë. Jemi të kënaqur sepse sjellim një trofe tjetër në Suharekë. Na vjen mirë që pas marrjes së titullit, kemi edhe fitimin e Superkupës. Nuk jemi në ditët tona më të mira sepse jemi në fazën përgatitore. Në këtë lloj ambienti, ndoshta do të kishte më shumë spektakël po të ishim në formën optimale. Ndeshja ishte me episode, por episodet zgjidhin ndeshjet. Jemi të lumtur, i uroj të gjithë për këtë triumf. Jemi me pikë të barabarta me Dritën. Ne kemi një grup me djem shumë të mirë, qoftë të talentuar, qoftë që kanë ambicie. Do ta kemi vështirë ta mbrojmë titullin. Por, ashtu siç kemi bërë gjatë gjysmës së parë të sezonit, ku zhvilluam edhe një sezon në veçanti në Evropë, do ta tregojmë veten edhe në këtë gjysmën e dytë të kampionatit”, ka deklaruar Daja, që me Ballkanin shkroi historinë.
E fitoi titullin historik, të parin në Superligën e Kosovës, ndërsa udhëhoqi Ballkanin drejt suksesit historik, kualifikimit në fazën grupore të Ligës së Konferencës.