Trajneri i Lille, Paulo Fonseca, vendosi që sot mos t’i besoi Edon Zhegrovës pozitën e titullarit, mirëpo anësori kosovar ia dëshmoi se e kishte pasur gabim. Ai për vetëm 20 minuta bëri një paraqitje fantastike, derisa në një rast ishte shumë pranë golit, transmeton Gazeta Metro.
Lille barazoi me rezultat 1-1 në kuadër të javës së 26’të si mysafir i Lens. Vendasit ishin të parët që kaluan në epërsi në pjesën e parë pas autogolit nga Jose Fonte, por gjithçka u barazua në minutën e 69’të nga Jonathan David.
Menjëherë pas golit të barazimit, Fonseca inkuadroi në fushë anësorin e Kombëtares së Kosovës. Ai solli freski në lojën e Lille dhe ishte një nga më të mirët për ato minuta sa pati në dispozicion.
Gjatë kohës shtesë po të mos ishte një pritje e shkëlqyeshme nga ana e Brice Samba, Zhegrova ia siguronte tre pikët skuadrës së tij.
Ai bëri një depërtim të mrekullueshëm nga krahu i djathtë, por për mrekulli intervenoi portieri 28-vjeçar.
Përveç kësaj mundësie, prishtinasi tentoi në pesë raste të dribloi kundërshtarët ku në dy të tilla ia arriti qëllimin. Ai gjithashtu bëri 24 prekje të topit, shtatë pasime (71% i saktë) dhe dy pasime kyçe.
Zhegrova këtë edicion ka zhvilluar 18 ndeshje dhe ka realizuar dy gola dhe ka asistuar në katër të tjerë.