Kombëtarja e Kosovës do të luajë vetëm për fitore në të gjitha ndeshjet dhe kemi gjasa t’i arkëtojmë gjashtë pikë në këtë muaj, kështu thotë ylli i Reimsit, Arbër Zeneli në një intervistë për Gazetën Nacionale.
Zeneli ishte një ndër futbollistët e ftuar nga përzgjedhësi Alain Giresse për dy ndeshjet e marsit.
Edhe pse me minutazhë të ulët këto muajt e fundit, anësori këmbëshpejtë është plotësisht i gatshëm t’i ndihmojë “Dardanët” drejt sukseseve.
Në një intervistë për Nacionalen, Zeneli deklaroi se po ndihet tejet mirë dhe në rast që Giresse i jep rastin, ai do ta dëshmojë kualitetin.
“Po është e vërtetë që nuk kam luajtur, por jam i gatshëm të ndihmoj për çdo ndeshje pavarësisht me kombëtaren apo klubin. Po e ndiej vetën shumë mirë me stërvitje dhe shpresoj që trajneri të më jep rastin ta tregoj vetën”.
28-vjeçari komentoi edhe lëndimin e rëndë që pësoi në vitin 2022, duke treguar se ishte familja që e motivoi të punonte për rikthimin sa më të shpejtë.
“E kam pasur një lëndim shumë të rëndë, por me mbështetjen e familjes i kam përballur mendimet negative. Mbështetja e tyre më solli pozitivitet”.
Zeneli tutje shtoi se kur luan në stadiumin “Fadil Vokrri”, ka ndjenja tjera dhe mezi pret t’i ndihmoj bashkëlojtarëve.
“Ndjenjat kur luaj në stadiumin Fadil Vokrri janë të veçanta, si për çdo lojtarë në kombëtare. Siç thashë edhe më parë, në rast që më vie rasti të luaj kam me dhënë maksimumin për me ndihmu kombëtaren sikurse më parë”.
I pyetur për grupin e vështirë që ndodhet Kosova, ai theksoi se duan t’i fitojnë të gjitha ndeshjet për ta realizuar ëndrrën, pra kualifikimin në Kampionatin Evropian “Euro 2024”.
“Unë dhe secili lojtar i kombëtares e kemi mendimin t’i fitojmë të gjitha ndeshjet. Janë lojë të forta por edhe ne si kombëtare jemi skuadër e fortë dhe shpresoj që do ta realizojmë ëndrrën tonë”.
Zeneli është në dijeni të nivelit të lartë të kundërshtarëve në dy ndeshjet e radhës ndaj Izraelit, respektivisht Andorrës por njëkohësisht optimist se do t’i arkëtojmë pikët e plota.
“Ndeshjet do të jenë të vështira se edhe te kundërshtarët luajnë lojtarët më të mirë të shtetit të tyre, prandaj do të bëhet shumë vështirë. Mirëpo, na shkojmë me shpresë dhe do ta japim maksimumin me i marr gjashtë pikët”.
Në fund, Zeneli nuk hezitoi të flet edhe për dy trajnerët duke theksuar se Giresse do t’iu ndihmojë të arrijnë në nivelin tjetër.
“Mua më kanë pëlqyer të dy trajnerët, si Bernardi (Challandes) që kemi pasur disa suksese. Tani është kohë e ndryshme dhe besoj që trajneri Alain (Giresse) do të na dërgojë në një nivel tjetër me lojën e tij”.
Përndryshe, Kosova do të nis aventurën në Kampionatin Evropian si mysafir i Izraelit më 25 mars, kurse tre ditë më vonë do ta pres Andorrën në “Fadil Vokrri”.