Edon Zhegrova ka bërë paraqitje të shkëlqyeshme në Kupën e Francës, të cilën synon ta fitojë me Lillen. Ai e ndihmoi ekipin e tij në fitoren 2:0 ndaj ekipit Pau në fundjavë
Edon Zhegrova ka qenë protagonist i Lillet në Kupën e Francës.
Ylli kosovar e ndihmoi ekipin e tij drejt fitores ndaj skuadrës Pau me rezultat 2:0.
Futbollisti ofanziv kontribuoi në golin e parë duke e detyruar futbollistin kundërshtar, Kouassi të shënojë autogol pas një pasimit të tij, shkruan “Gazeta Express”.
E më pas, golin e dytë të vendësve e realizoi Gomes.
I kënaqur me paraqitjen e tij dhe me kalimin tutje u shpreh përfaqësuesi kosovar.
Ai madje nuk e ka fshehur dëshirën dhe synimin që në këtë sezon me Lillen ta fitojë trofeun e Kupës së Francës.
“Ndeshjet si kjo nuk janë kurrë të lehta, kundër një ekipi që mbrohet shumë. Është mirë që e fituam lojën dhe që u kualifikuam për në rundin tjetër. Tash synim yni është që ta fitojmë Kupën. Duhet të bëjmë gjithçka për ta arritur këtë qëllim”, u shpreh futbollisti i krahut të djathtë.
Zhegrova nuk ka arritur ta sigurojë ende një pozitë titullari tek Lille, por po punon që ky të jetë viti i tij.